Ekainaren 5ean, Musikart-eko artistek ikasturte amaierako kontzertu ederra eskaini zuten Niessen Kultur Etxean, musikaz, ilusioz eta emozioz beteriko arratsaldea oparituz.
Hilabete hauetan ikasitakoak eta bizitakoak oholtzara eraman zituzten, gogoz eta naturaltasunez. Ahotsen bidez ez ezik, ikasturte osoan egindako lana, hazkundea eta musikarekiko duten ilusioa ere partekatu zituzten ikus-entzuleekin.
Familia, lagun eta gertukoek giro bero eta hunkigarrian jarraitu zuten emanaldia. Txaloak eta irribarreak nagusitu ziren hasieratik amaierara, eta agerian geratu zen txikiek oholtzan gero eta segurtasun handiagoz eta konfiantzaz gozatzen dutela.
Ikasturte amaierako kontzertu hau aukera paregabea izan zen Musikart-eko kideek lehen esperientzia eszenikoak bizitzen jarraitzeko, taldean kantatzearen ilusioa eta publikoarekin partekatzearen emozioa sendotuz.
Horrela, Musikart-ek beste ikasturte bati amaiera bikaina eman zion, Landarbasoren harrobia ilusioz, talentuz eta musikarekiko maitasunez hazten jarraitzen duela erakutsiz.
