Joan den asteazkenean, urriaren 18an, Joxemi Zabala gure presidenteak eta Iñaki Tolaretxipi musika eta arte zuzendariak Madrilera jo zuten Landarbaso taldearen ibilbideko hitzordu instituzional garrantzitsuenetako baterako.
Zehazki, Kultura eta Kirol Ministerioko Arte Eszenikoen eta Musikaren Institutu Nazionaleko (INAEM) zuzendari nagusi Joan Frances Marcorekin, INAEMeko Musika eta Dantzako zuzendariorde nagusi den Ana Belén Faus Guijarrorekin eta Espainiako Gobernuak Euskadin duen ordezkari Denis Itxasorekin bildu ziren.
Topaketak Landarbaso gaur egun zer den ezagutarazteko balio izan zuen, ez bakarrik musika eta kontzertu mailan, baita prestakuntza mailan eta garatzen ditugun beste jardueretan ere.
Bereziki, gure haur eta gazte abesbatzen lana nabarmendu zen, Kontari – Landarbaso eta Landarbasoko Dizdizkarena. Izan ere, INAEMetik onartu zuten bezala, musika korala krisian dago bertan inplikatutako gazteen faltagatik. Ildo horretan, Landarbaso eredugarritzat hartu zen.
Gainera, aurtengo udan Balin lortutako arrakastei balioa emateko aukera ere izan zen. Tolaretxipik azaldu zuen gure helduen abesbatzak 2nd Asia Grand Prixeko finalean parte hartu ahal izan zuela, 2019an 8th Bali International Choir Festival lehiaketa irabazi zuelako.
Garaipen honen dimentsio historikoa azpimarratu zen; izan ere, Landarbaso izan da Grand Prixeko sari bat lortu duen Estatuko lehen abesbatza, eta Asian sari hori lortu duen Europako lehen taldea.
Oso eskertuta gaude INAEMi eta Kultura eta Kirol Ministerioari egindako harreragatik, eta espero dugu horrelako bilerek musikaren bidez inpaktu positiboko aukerak areagotzen lagunduko digutela.
